Martina & Andreas
Herzlech Wiukomme! Schön as üs uf üsere Reis begleitisch
Die erste paar Läbensjohr hani z Solothurn vrbrocht. Ufgwachse bini näre z Lengnau im Kanton Bern… aber dr Solothurner-Dialekt hani zum gröschte Teil bhautet ;)
Sitem Oktober 2019 wohni i dr schönste Barockstadt vo dr Schwiiz (…nei vor Wäut!). :)
I ha d Lehr aus Detaihandelsfachfrou bi dr Post abgschlosse und ha dört näre es paar Johr am Schauter gschaffet. Houptsächlech in Biel / Bienne. I dere Zyt hani de no ä Sprachufenthalt vom ne Johr in Genève gmacht und probiert französisch z lehre… bim probiere isches de blibe…
Sitem Februar 2017 schaffeni bir Regiobank z Solothurn und hami de zur Finanzplanerin witerbildet.
Zum Usglich dueni sehr gärn mau öppis Backe oder schüsch äs neus Rezept usprobiere, es guets Buech läsä oder ä cooli Serie streame. Ab und Zue bini ou mit mim Töff -meistens im Jura- ungerwegs.
Mit üsem Büsi, dr Bonnie, heimer üs ä grosse Wusch erfüllt. D Bonnie heimer im Juli 2022 vorem Tierheim bewahrt und die chlini Streunerin bi üs ufgno und würde se niemeh härägäh!
So…dir wüsst i bi nie die vo de grosse Wort gsii, darum dr Räscht überlohni mim Ehemaa.
Ufgwachse bini aus eutischts vo 4 Ching im beschouleche Stettlen bi Bärn (auso die erschte paar Jahr no z Thörishaus, aber da mani mi nümme erinnere). Dört hani ou d Schueu bsuecht und äs paar vo mine beschte Fründe kenne ig scho sitem Chindergarte.
Nach dr Schueu hani de ä KV-Lehr uf dr damalige SBG (hüt UBS) gmacht und nach dene 3 Jahr hani när zur BEKB gwächslet. Nach paarne Jahr am Schauter und im Internet-Banking hani när d Bank verlah und diversi angeri Jobs usprobiert. Im 2007 hani de beschlosse, miner Zäut i mire Heimat vorübergehend abzbräche und bi uf Dütschland, gnauer uf München züglet. Dört hani 6 wunderschöni und lehrriichi Jahr dörfe verbringe (2 vo dene 6 Jahr hani no z Kissing ir Nechi vo Augsburg gwohnt) und äs gäb no mängi Gschicht z verzeue, vorauem wenn aube Bsuech us dr Schwiiz isch cho ;-)
Im 2013 isches du Zyt gsi, wider hei z cho und zwar i die schönsti Stadt vor Wäut uf Bärn :D Dört hani ou no im 2018 gwohnt, woni ar Fasnacht mini grossi Liebi und hütegi Frou ha lehre kenne. Nachere gwüsse Zyt, wo mir du gmerkt hei das mir enang eigentlech no ganz sympathisch finge isch de ou ds Thema vom zämezieh ufe Tisch cho. So isches du cho, das mir im Oktober 2019 üsi ersti gmeinsami Wohnig im, das darf ig hie zuegäh, ou sehr schöne Solothurn gfunge hei wo mir ou hüt no zäme wohne.
I mire Freizyt stöh d Chance gross, das Du mi a folgende Orte atriffsch: Im Wankdorf-Stadion wenn YB spiut, imene Adventure-Room, ab und zue amene Konzärt, hingeremne guete Buech, amene Krimidinner, vorem TV wenn Sport louft (sehr zum Lidwäse vo mire Frou) oder ungerwägs mit guete Fründe.
Uf üsi Reis dür Oustralie fröie ig mi sehr, da “Down Under” sit jehär ä grossi Faszination und Aziehigschraft uf mi usüebt. Einersits natürlech die faszinierendi Tierwäut, aber ou ds Outback, die wunderschöne Landschafte sowie d Städt und ds Meer heimers scho länger atah. Ig bi scho sehr gspannt, was aues uf üs wartet und fröie mi, das über üsi Website mit öich chönne z teile. Wöu äs paar Sache wärde mir sicher fähle i dene 3 Mönet wo mir wäg si. Das sit eienrsits Dir, üser Fründe und Familie und natürlech ou üses Büsi, d Bonnie.
Itze isch ou vo mire Site gnue verzeut und ig wünsche öich viu Spass uf üsere Site :-)
Am 27. Dezämber 2023 wärdä mir üs für 3 Mönet vo dr schöne Schwiiz vrabschiede und i nes Abentüür starte.
Üsi Reis füehrt üs de vo Züri nach Singapur, hie gits ä churze Stopover womer d Stadt chöi erkunde. Am nöchste Tag geids de vo Singapur witer nach Perth, und somit Welcome in Down Under.
Z Perth und ir Umgebig wärdä mir öppe für rund 3 Wuche sii. Z neue Johr wärdä mir ä es paar Stung vor euch empfoh…hoffe mir ufnes Happy 2024.
Nach äs paa Täg im Hotel wärdä mir üse Camper übernäh und rund 2.5 Wuche d Umgäbig erkunde. Näre wärdä mir no z Rottnest Island übernachte und hoffentlich viu härzigi Tierli (Quokkas) gseh. Churz drufab wärdä mir Perth richtig Alice Springs verloh.
Z Alice Springs wärdä mir rund 1 Wuche sii und ä gfüehrti Tour ha, wo mir i Camps übernachte und Wanderige ungernäh und hoffentli dr eint oder ander Sunneufgang resp. Sunneuntergang bim Uluru chöi beguetachte. Nach dere Ziit heimer rund ⅓ vo üsere Reis scho hinger üs und starte i die letzi Etappe vo üsem Abentüür.
In Adelaide acho übernäh mir zum zwöite u letzemau üse Camper, üses fahrende Deheim für die nöchste 2 Mönet.
Planet isch, dass mir vo Adelaide via Kangaroo Island nach Melbourne fahre. Denn ä Abstecher nach Tasmanie mache und ca. Endi Feburar wider z Melbourne sii. Anschliessend näme mir d Great Ocean Road i Agriff um schlussemend Endi März 2024 in Brisbane azcho. Denn wärdä mir mit dene viele Idrück und wahrschindlech aberhunderte Souvenirs dr Rückwäg via Singapur uf Zürii in agriff näh.
Mir fröie üs wenn Du uf üsere Reis “drbi” bisch :)
Liebi Grüess
Martina & Andreas
